18 Jun 2009

PAI 7/OP JUMONGGA/OP. TRENING DAN CERITANYA

Dison ma saring-saring :
Op.Jumongga doli/Op.pai 7 dohot Op.Jumongga boru br. Sianipar
dohot ianakhonna :
1.Op.Saulani (Drs. Wilson Soaloon siahaan)
2.Op.Maichel (Pariaman Siahaan)

"Molo mate au haduan ingkon di joloni jabu on do bahenonmuna jabu-jabuhu", inna Ompu i tu bapa (Wilson Soaloon) tingki ngoluna dope. Joloni jabu i maksudna ima parpollahan ni antajau topat dijoloni jabu ni ompung i- di huta Saitnihuta Aek bolon.

Ia Ompung Jumongga/Op. pai 7 ima anakni Op. Simangalanja sian na 9 halak, jala urutan partubuna i do gelar-gelarni anakna na sia i ima : pai 1, pai 2, pai 3, pai 4, pai 5, pai 6, pai 7, pai 8, pai 9 . Sian na 9 halak i holan ompu pai 8 ma namangolu ditingkion.
Op. Simangalanja dohot ompu Tumiar (anggina) anak ni Op. Silansat nabegu. Op. Silansat Nabegu ima anak ni Op. Mora pai 4 sian na 6 halak. Ima 1. Op. Mulana 2.Op.Gimba 3. Op Andan 4.Op.Silansat Nabegu 5.Op.Soingganon 6. Op. Huala

Sai ni ingot do uju ngolu ni ompung i (pai 7) - sipata hami pahompuna manjou ibana ompung trening, ala sai bangga do ibana mamakke stelan olah raga na binoan ibana sian Bandung. Jala ima na naeng sisaritahononhu di son.
Molo tingki manghata-hatai iba dohot ibana ujui, sai totap do ingkon jolo dalananna inna Bandung, "mamereng borunghu si Tialam"," namborum inna". Jala sai dielek-elek oompung ma bapa asa dipaloas laho mardalani tu Bandung. Maol do antong bapa mangolohon pangidoanna i, so haru hipas dagingna, satongkin-satongkin ura do marsahit, hape molo tu Bandung annon boa ma i, huta sileban do disan, "inna bapa tu hami". Alai malo do ompung, dang dipaloas bapa lao do ibana tu anakna naasing. Margaya politik ma ompung boa asa boi tombus pangidoannai, laho tu jabu anakna nasada mangido pangolopion songoni tong tu anakna na asing. Saut ma antong nasinita-sitahon nirohana i, ujungna dang tarambati bapa be. "Molo ingkon i nama ba lomom ma"," inna bapa". Las ma rohani ompung nang pe nunga dipaboa markapal hercules do ibana tu Jakarta, jala sian Jakarta manambung dope mar bus tu Bandung. Bapa uda par AURI (anakhonna si Jakkes) ma namangurus parborhatna asa boi mar-herkules. So boi pastihonon andigan herkules borhat inna bapa uda par AURI molo sai disungkun ompung andigan do borhat. "Ai mamboan angka tentara do i inna muse" disada tingki. "Dokhon ma asa dipatibu borhat inna ompung", mengkel-engkel ma hami mambege hata ni ompung i. Nang pe songoni anggo bapa sai lomos do rohana dohot bapa uda tingki i, so hea dope mardalani sahat bariba ni laut, "haru marbahasa Indonesia so diboto inna bapa", "boa do i poang? " inna tu anggina (bapa uda jakkes)". "Nunga sai martahan ibana na ingkon borhat jadi homa poang pasahathon tu angka donganmu AURI i asa diparrohahon, "molo boi nian asa dipataru sahat tu Bandung inna bapa", "hupasahat pe abang", "alai hira so mungkin do pataruhonna sahat tu Bandung, ai herkules i langsung do muse habang tu daerah lain", "inna bapa uda", toe ma poang urus ma boa asa boi sahat bapa tu Bandung, "inna bapa muse".

Borngin andorang parborhatna sai dipoda-podai bapa ma ompung asa totap manjaga kesehatan, jala unang pabodarihu asa modom. unang sai tarlambat mangan dohot angka naasing dope, "olo inna ompung" huhut marminar-minar bohina. "Unjago do au sian hamu sude inna huhut".
Marsogot nai nitaruhon ma ompung tu bandara Polonia, bapa uda par AURI (jakkes) ma na mamboan sahat tu bagasan kapal herkules, jala disima dipasahat bapa uda i tu angka crew ni kapal i asa diparrohahon jo natua-tua i. Dungi habang ma herkules i....boa do naeng ompung diginjang?.......mabiar do manang na sai mengkel-engkel do?..hhmmmmm
Kapal herkules i dang langsung habang tu jakarta alai jolo songgop disada kota (lupa au kota aha), boi do antong turun angka panumpangna i andorang so habang muse, jala nunga dipabotohon hian i tu angka panumpang. Dohot ma antong ompung tuat sian kapal i, di parrohahon ma angka panumpang na asing mardalan tu sada inganan, ibana pe mangihut ma tusi. Ala lalap mamereng-mereng pemandangan dang diingot ompung be naung ro gora-gora asa sude panumpang masuk muse tu kapal herkules. Sahalak crew ni herkules i (naung ditonahon bapa uda par AURI) marikkati mangadu ompung, jala hira songon na diompa ma ompung huhut marikkati muse nalaho tu kapal herkules i. Di onjorhon ma ompung nalaho pamasukhon tu kapal i. ah tutu................botul-botul do kapal militer ate!

Sahat tu Halim perdanakusuma didongani crew (AURI) ma ompung tu terminal cililitan nalaho mangalului bus tu Bandung (dang adong dope tingki terminal kp.Rambutan). Ala dang boi crew hercules i leleng mandongani ompung dipasahat ma tu kenek ni bus jurusan Bandung i asa diparrohahon ompung i, jala didok crew (AURI) ,"natua-tua on adong do anakna AURI jadi unang sampe lilu". Hundul ma ompung di bus i, anggo crew hercules i nunga parmisi mulak ala adong dope tugas. Hundul ma ompung di bangku ni bus i jala huhut ma sai gomos ditiop hadang-hadanganna (tas) sotung dicopet inna rohana. Dang piga leleng mardalan ma bus i, hira-hira sajom mardalan disungkun ompung ma kenek nai, "nunga jonok pasar andir?" sotung lupa ho da "di pasar andir do au tuat", "olo ompung inna kenek nai"(hatohoan halak karo), dang piga leleng nai disungkun ompung i muse "nunga sahat di pasar andir?", "daong dope ompung, hupaboa pe molo dung sahat inna kenek halak karo i". "Ompung tidur saja, masih jauh perjalanan inna muse". Dung marpiga-piga hali disungkun ompung kenek nai gabe dang dialusi be sungkun-sungkun nai, nunga songon na malas horoa mangalusi ompung i.

Sahat di Bandung ditaruhon kenek halak karo i ma ompung tu tukang becak. "antar ompung ini ke pasar andir , harus sampai rumahnya ya"!. Sahat ma becca i tu pasar Andir. "Dimana rumahnya ompung?" , "inna par becca i" manungkun ompung. "Tidak huboto alus ni ompung", "ompung mau ke rumah siapa?" "sungkun ni par becca i muse", "kerumah boruku lah"!, nunga antar gogo soara ni ompung mangalusi par becca i. Gabe manungkun-nungkun ma par becca i tu halak na di pasar, topet ma adong sada ina namambege sungkun-sungkun ni par becca i, jala di dokma "mungkin eta ka bumi si opung?, mamahnya si ocen!, jala huhut di suruh ma sahalak dak-danak disi paboahaon tu jabu ni namboru. Intor marikkati ma antong namboru mamereng. Aha.......masihaolan ma antong namboru dohot ompung didalan i, huhut sai didok namboru ma tu angka jolma na di si, "ini bapaku baru datang dari Medan"!. Memang dan panagaman ni namboru haroro ni ompung, soadong dope hape (handphone), holan komunikasi surat dope tingki i jala telepon pe mansai arga dope dungi dang piga-piga dope nampunasa.

Di Bandung ma ompung marpiga-piga leleng, sai holan na marsarita i ma karejona dohot pahompuna ima si Jhonsen, si Agus dohot si Neneng tingki i. Sipata namboru ma gabe penerjemah molo adong na so diantusi halahi, marganti-ganti ma mamboan ompung mardalan-dalani di sekitar pasar andir. Dung piga-piga leleng sahat ma barita tu Medan naeng mulak nama ibana ala parsahiton...... posi do sahitna inna barita i. Tarsonggot ma halak bapa tingki i, humalaput ma bapa dohot bapa Uda par AURI. "Ai posi do inna sahitna poang", inna tu bapa uda par AURI. "Boa do i, boa do parmulakna tu son?. Sian panghataion ni bapa dohot bapa uda dapot ma keputusan ingkon mulak do ompung tu Medan. "Dang mate di joloni boruna natua-tuai da", "inna bapa". Boi dope mar kapal habang ibana sian Bandung tu Medan? ima sungkun-sungkun tu Bandung. Jala diputushon ma ingkon markapal habang ma ompung alai holan sahalakna do......bersambung

No comments:

Post a Comment

Tidak diklaim kalau yang saya upload adalah sudah benar, jadi bila ada masukan/komentar yang sifatnya meluruskan apalagi menyangkut silsilah/tarombo dengan rendah hati akan saya terima dan saya ucapkan terimakasih