OMPUNG TARUTUNG

Molo tingki mulak tu Aekbolon sai jolo nisangahon do nanggo apa satongkin paiashon Hinambor ni ompung on.
Ia ompung on margoar ma Op.Risma doli (Ernest Sianipar) dohot Op.Risma boru (Br. Pasaribu). Uju ni ngoluna di dolok do ompung on marhuta ima Tarutung dolok. Ingot do iba dihaburjuon ni ompung on jala namambahen goar niba pe ompung on do. Talu iba marbadai/margulut dohot abang si Arifin (A.Lani), molo adong namambadai iba jala molo soadong getep (hepeng) sai intor tu Tarutung do iba najolo mangalu-alu. Nang pe dung magodang hami angka pahompuna jala nunga pindah tu Medan alai molo tingki ro tu aekbolon sai totap do iba nangkok tu dolok laho pajumpang tu ompung on. Sian ompung on ma niboto mar siadapari, mangombak, manabi tingki panen dohot mambahen luhutan, mamampas, pamasukhon tu goni laho huntion di tanggurung jala mangusung tu jabu, sahat tu namanjomur dohot mamboan tu paberik hian sanga do iba mangurupi ompung on. Molo tingki onan (Jumat) rap dohot ompung boru mardalan ma hami sian Tarutung dolok huhut mamboan bagot (susu kerbau) laho gaison tu pasar Balige. Sai nitiop-tio ma tangan ni ompung boru huhut mamereng-mereng angka sipanganon na di onan i. Diboto ompung boru do antong nadibagasan roha niba, intor dituhor ma sipanganon Mout dohot kue luvis na markalapa i.

Dung suda gogo ni ompung jala hira so boi be nangkok dohot tuat sian Tarutung dolok ( sabatu nakkohan) pindah ma ompung tu bariba ni paberik na di sosor nauli (najolo sibegu laos) disima halahi nadua marjabu, alai anggo rohana sai totap do tu dolok-dolok i.
Sahat tu namarujung disinama halahi nadua marjabu, disiamun ni jabu i ma dibahen hinamborni halahi nadua. Hinamborna on ma sai ni paias molo tingki mulak iba tu aekbolon. Tahe ompung............!!