Tingki dimasa-masa nasalpu molo adong namanungkun tu iba, isarana Siahaan dia do ho? nialusan hian ma Sibuntuon! Sibuntuon dia ma ho? longang ma iba. Sipata Siahaan Raja Parluhutan hian ma nidok, sipata nidok muse Sihaaan Paindoan.
Ai molo nidok Siahaan Aekbolon gabe namanungkun i do longang. Naadong do Siahaan naimbaru? ninna ma!.
Hea ma sada tingki nalaho tuparsingkolaan iba mar bus Desa maju do tingki i (bus 3/4) angka panumpangna/sewa nunga mansai gok jala marsosak-sosak songon ikan robus, hubereng ma sada ina-ina nakkok hape nunga miring bus i alani gok ni jolma, "geser-geser"ninna kenek nai ma tu angka jolma namangambati dalan asa boi masuk tubagasan bus i.
Tepatma dilambunghu jonjong ina-ina i, asi ma rohakku hudokma "duduk disini aja Namboru" - terimakasih ninna huhut hundul ma ibana jala gabe jonjong ma au dilambungna i. Bangkona do manungkun songon patuduhon las ni rohana, aha do marga muna amang nina ma! hudok Siahaan namboru, Siahaan nomor piga ma ho ninna muse, hualusi muse "nomor 2 namboru". aha do nimmu! ulanghon jo, tokka do gait mangalusi natua-tua da! Bah......sudah dikasih tempat duduk malah marah! namboru ini harusnya berterimakasih bukan malah marah-marah hanya soal marga! lagi pula saya memang anak nomor 2, kenapa jadi masalah buat namboru ini. ah,,,,masa bodo!.
Turun ma au ala nunga jumpang simpang na tu parsingkolaanhu. Alai sungkun-sungkun do rohakku bosa songoni muruk ni namboru i nangkin. Dung sahat au tu jabu intor husaritahon ma antong namasa sinangkinin, mengkel ma bapa tingki i, molo adong sungkun-sungkun Siahaan nomor piga tu ho alusna nomor 14 do alusna, bapa nomor 13, ompungmu nomor 12, ompung ni bapa nomor 11 (penomoran silsilah) ninna ma. Alai piga ma hamu anak ni bapa? jala anak nomor piga ma ho? alusna songon na didok mima ninna ma tu au huhut sai mengkel. Sahat tu naung marhasohotan iba sai Siahaan Sibuntuon hian do alus niba, sipata Paindoan alai molo lam disungkun Sibuntuon dia? dang nialusan be i. Sipata adong mandok so adong Siahaan Paindoan ai goar nihuta do Paindoan. Molo songoni Siahan Aek bolon ma nidok (lamu sursar do ate). Hea do tong adong namandok Aekbolon dang huta ni Siahaan i, na sonduk hela do Siahaan tu si (aha muse on). Jadi huta ni ise do Aekbolon? huta ni Raja Tampubolon do? huta ni Raja Pardede do?. Molo nibereng Hula-hula ni Ompu Mora memang Raja Tampubolon do, jala hulahula anak manjae pe/hula-hula naposo (6 anak ni Op. Mora) ima :
Rdj.O Mulana/br.Tampubolon
Rdj.O Gimba/br.Tampubolon/br.Tampubolon
Rdj.O Andan/br.Pardede
Rdj.O Lansat Nabegu/br.Pardede
Rdj.O Seingganon/br.Tampubolon
Rdj O Huala/br.Tampubolon
Jala namanubuhon Op.Mora pe marhula-hulahon Raja Tampubolon do, songoni tong Ompung ni Ompu Mora tong do marhulahulahon Raja Tampubolon. Molo memang na sonduk hela do Op.Mora Siahaan tu Aekbolon mulai sian Ompu dia ma i? jala dang holan Op.Mora Siahaan namarhuta disi adong tong disi marhuta haha doli Datu Jonggar suang songoni haha doli Parasi jala boasa dang adong muse disi marhuta anggi doli Rajai Hot nihuta(data di au 3 ma anak niRajai Hotnihuta :1.Sahatnihuta 2.Sohuturon 3.Hasantian)
Tu dia do marhuta na 3 i? Sahat tu saonari on dang haru niboto pomparan ni Rajai Hotnihuta on. Tangan manomba dohot jari-jari sampulu pasumpulu sada simanjujung, jumolo au marsantabi molo adong nahurang/lobi dipanuratan on-Mauliate molo adong nanaeng patingkoshon
29 May 2009
AMA BOY, OP.MORA DOHOT AEKBOLON
27 May 2009
SIMIN OMPU MORA
On ma simin ni Ompu Mora na pinungka ni Ompu i naujui (mohon data empiris tahun pembuatan bagi yang mengetahuinya). Sinungkun inong (tubu taon 1938) nunga adong simin i uju haetehonna. Inganan ni simin i di Toru ni huta Dolok Nasuksuk Aekbolon Jae Kecamatan Balige kabupaten Tobasa, dijoloni simin i tangkas do tarsurat :
Rdj O.MORA SIAHAAN
O si MORA br.Tampubolon
dohot angka ianakhonna :
1.Rdj O. Mulana/Br. Tampubolon
2.Rdj O. Gimba/Br.Tampubolon/Br.Tampubolon
3.Rdj O. Andan/Br.Pardede
4.Rdj O. Lansat Nabegu/Br.Pardede
5.Rdj O. Seingganon/Br.Tampubolon
6.Rdj O. Huala/Br.Tampubolon
Molo tarimangi namarsangkap ma ompu i najolo asa sisada anak sisada boru sisada tahi nasida namarhaha maranggi diangka ulaon namasa tingki i, sada sungkun-sungkun behado ompui patupahon simin i? jala piga leleng tingki pasaehon?, holan panggu dohot raut/parang dope adong ujui. Satolop do ra hita angka pinomparni Ompui mandok"Sada ni Roha nasida" do patupahon simin i. Beha do hita pinomparna dijaman hamajuonon? Taalusi be dibagasan rohanta.
SD NEG AEKBOLON
Dison ma au marsingkola tingki marumur 5 taon, so boi dope nian iba marsingkola tingki i harana manghatai pe hallang dope, gabe hira singkola parmeaman ma parsingkolaan i alana asa boi inong tu hauma manang tu balian mangula siulaonna ai nunga pos roha ni inong adong namanjaga iba diparsingkolaani, guru niba tingki i ima inang Jetty br.Sianipar.
Holan mar 6 bulan do iba marsingkola disi ai intor pindah ma inong mangihuthon bapa tu Medan. Molo mulak iba tu Aekbolon sai husangahon do mandulo parsingkolaanhi. Sai na malungun do au tu parsingkolaan i. Alai ndang SD negri hian dope goar parsingkolaani. Ujui ndang marsipatu manang marsolop molo naeng tusikkola. Molo sinungkun inong taringot namasa tingki i mansai lungun jala porsuk do ninna, sai holan na mommonon do iba jala manghatai pe so haru tangkas, hape angka dongan satorbang nunga malo manghatai. Mandok Tarutung (huta ni Ompung sian inong) nidok hian do ta-ta-u-tung. Lomo hian do roha nangkok tu dolok (tarutung) tu huta ni ompung ala dirobean sai godang do harimonting naboi allangon, hape sian sibuni-buni sabatu nangkok tu dolok (tarutung) alai sohinilala i ala ni las niroha jala molo mulak sian dolok sai jot-jot do iba dapotan getep, las ma roha huhut marikkati mulak tu toruan. Saonari molo tikki mulak iba tu Aekbolon nibereng ma dompak dolok-dolok i. Beha do dibahen ompung nakkok tu dolok i jala beha muse tingki tuat hape hira totap do molo nangkok manang tuat marsiboanon disimanjujung manang maniop siboanon ditanganna," Amazing,,,,,,,, Songon na mendaki gunung nama nihilala. Dung sae singkola iba sian SMA dang hea be nakkok tu dolok i, ai so sanggup be iba. Diujung ni ngolu ni ompung pindah ma halahi tu Sosor nauli jala disima halahi nadua marujung ngolu. Inspirasi do ompung nabinahenmi tu hami angka pahompumon! sahali nai amazing,,,,,,!
26 May 2009
JUNIOR
Boy Christian Siahaan,,,, nama yang berasal dari papa dan mamaku. Aku lahir hari Sabtu pukul 12.35 tahun 2002 lewat operasi caesar, Dokter Esanov Hasibuan yang membantu kelahiranku.
lewat 5 hari dirumah sakit mamaku diperbolehkan dokter pulang tapi aku masih harus tinggal dirumah sakit karena keadaanku yang masih lemah dan masih buang-buang air, karena mamaku sudah diperbolehkan pulang berarti aku dianggap pasien baru oleh rumah sakit yang berarti juga harus memberikan data-data baru seperti nama. Karena aku kan belum punya nama sementara pihak rumah sakit mendesak maka papaku menyebutkan nama yang tidak dipersiapkan lebih dahulu,,,,papaku berfikir cepat dan menyebutkan BOY.
Nama itu disebutkan hanya untuk sementara dan hanya sebagai kelengkapan administrasi rumah sakit. Karena keadaanku yang sering drop dan sakit papa dan mamaku tidak sempat berfikir untuk mengganti namaku lagi. Sampai tiba saat aku dibaptis tepatnya hari Natal maka resmilah namaku Boy Christian Siahaan. Sekarang aku tumbuh semakin kuat dan sehat, sedikit-sedikit papa mengajari aku bahasa batak dan aku juga sangat ingin melihat kampung kelahiran papa. Oooo ya,,,,, kata papa aku Siahaan /Tuan Mauli/ Datu Martahuluk/Op.Mora/15. Salam ya untuk semua pomparan Ompu Mora-Semoga rukun dan sukses selalu
SIBUAL-BUAL
Sibual-bual ma inganan paridian tingki haetehon i, mansai tio mual nai jala manorus pangkilalaan molo maridi disi.
Aek siinumon pe sian sibual-bual hian do tong, dihunti ma i disimanjujung jala tangan hambirang ma maniop ember na disimanjujung i anggo tangan siamun maniop ember namarisi abit manang piring naias mai. Mamolus ma iba sian hambirang ni simin ni Ompui laho mulak tu jabu, alani biar sai nitiop-tio ma huhut tangan ni inong tingki mamolos simin i jala dalan pe nakkok-nakkohan tarlumobima ditoru ni hariara i.
Dung hira sahat pe tuharbangan ni Dolok nasuksuk asa nipalua tangan ni inong i jala huhut ma iba marhosa-hosa. Didok huta dolok nasuksuk alani memang dolok-dolok do hutai, dang piga pola jabu disi jala niingot dope disiamun ni jabunami ima jabu ni bapatua hampung (Bp.Tua Musa) disimaunnai muse jabu ni Opung pai 8, dijoloni jabu nami ima jabu par ruma, sude jabu i sahat tusaonari adong dope holan jabu ruma ma naung rumpak alani palelenghu dang diingani. Ah tahe huta hatubuan i (sai namasihol do au tuho)
25 May 2009
SOSOR NAULI
Huta pamolusan molo naeng tu onan Balige sian Tarutung dolok, Lumban gaol, Saitnihuta, Dolok nasuksuk, Siparenggean dohot sian gareja HKBP, Pandia dohot sampuran. Songoni tong molo mulak iba sian maronan manang sian Balige sai na jolo boluson do huta on.
Tingki i niingot dope adong kode molo dang sala kode ni Pantas Sianipar (santabi) namanggadis angka goreng-goreng jala mansai lomo hian roha manuhor goreng kalapa hijo, jala tingki marujung ompung disi do hami maridi dohot marganti baju, dijoloni kode ima paberik ugasan ni gurukhu hian Jeti br.Sianipar (santabi), dihambirang ni paberik ima jabu ni ompung (dang huingot jabu ni ise hian i andorang so dituhor ompung). Jala disosor nauli do huta ni namargoar Raja Toba (molo dang sala au Tuan Mauli/DM/ Parasi), didok Raja Toba ala na karejo dipasar Balige hian do ninna nasida. Molo mulak iba tu Saitnuhuta sai jolo so do iba di Sosor nauli on ai disi do huta ni Bapa Uda/Inang Uda jala sai jolo memereng do iba tunahumaliang songon na palua sihol, molo ujui maridi iba jolo turun do tubinanga na ditorunai alai nuaeng on nunga adong kamar mandi be dijabu i. Gombar i ma jabuna. Ro dope au tu si!
JAMBATAN AEKBOLON
Sian dian do asal goar huta Aekbolon ? molo pandapothu jala sian pandok ni angka natua-tua molo ro udan mansai balga gabe banjir ma binanga na mambola huta i jala angka batu na sian dolok (sampuran) dohot ma tarboan aek hinorhon ni aek na balga i didok ma nunga ro aek nabolon/aek bolon.
Jot-jot do najolo jambatan i maup dibaen aek nabolon i, angka jolma pe antong dang barani mamolus tingki i alani balga ni aek i, sai jolo mahiang jo/marhurang bolon ni aek i asa boi mamolus. Alani jot-jot do maup jambatan i dibahen aek molo tingki ro banjir dipature ma jambatan i sian bosi beton asa unggogo molo ro aek nabolon i, ipe hea do maup jambatan i nangpe nunga dibahen sian bosi (bereng na disiamun jambatan i/jambatan lama). Ido manurut panurat asal muasal goar Aekbolon (pandapot ni panurat) .
On ma jambatan pamolusan molo tu Saitnihuta, Dolok nasuksuk, Siparenggean, Lumbangaol, tarutung dolok songoni tong molo sian angka hutai molo naeng tu pasar manang tu Balige. Molo ujui molo ro mobil tu gareja do maradian ai so boi sahat tu saitnihuta, alai saonari nunga boi mobil (nametemet) sahat rodi saitnihuta alai anggo kendaraan naumbalga isarana 3/4 dang bolas dope sahat tu saitnuhuta, antong asa manat-manat molo mamolus sian jambatan i lumobi mangusung kendaraan mobil.
DISON MA AU TARDIDI NAUJUI,,,,,HKBP AEK BOLON
On ma gareja HKBP aekbolon, dison ma sude ujui margareja parhuta aekbolon, molo makhuling giring-giringna tarbegedo sahat tu tarutung dolok, jala ima jou-jou tu angka parhuta i asa mangarade laho marminggu.
Digareja on do Bapa nahinan marsiajar mar "poti Marende" nangpe nibege sian bapa nahinan marsiajar sandiri (otodidak) do jala mansai maol do ninna molo naeng mamakke poti Parendean i, sai jolo mulak ma parmingguan asa boi ibana marsiajar. Di ari minggu i disi ma angka jolma pajumpang sambil marsarita-sarita dilapo/kode, iba dohot angka dongan satorbang marmeami marikkati sipata laos disi do kesempatan molo naeng marpangkas iba, ai adong do parpangkas disi.
Botari do do marmulahan angka jolma molo tingki ari minggu i. Ia saonari adong ma muse gareja GKPI di jonokhon huta sosor nauli ima dalan molo tu gareja HKBP i. Molo adong ro namamboan saring-saring sian angka pangarantoan sai jolo tu gareja HKBP aekbolon i do diboan, sipata disi majolo marborngin paimahon binsar mataniari. Hami pe tingki mamboan saring-saring ni bapa nahinan sian Medan tong do tu gareja HKBP i hubahen hami marborngin, dung pe marsogot nai asa diboan muse tu inganan naung hupature hami ima di Saitnihuta.
Mansai godang do siingoton sian HKBP on jala disiamunna do singkola dasar dipudina dolok-dolok, dolok dolok i sai songon namanglinggomi ma tu gareja dohot parsingkolaan i. Hubege saonari on nunga muse adong Balai serba guna. Mulak dope au memereng i!! Paima au
Saitnihuta Huta Hatubuan
Aekbolon huta hatubuan,
Disi do tano hatubuan, Saitnihuta aekbolon jae. Kecamatan Balige, Kabupaten Toba Samosir.
Maridi disibual-bual tingki haetehon i, mangallang gadong na tinutungan , marbadai dohot angka dongan sai niingot dope i nang pe dijaman hamajuon on. Molo jumpang ari Jumahat las situtu ma roha ai jumpang ma ari onan, tangis do nanipangasahonon asa boi dohot maronan tu Balige, mardalan do tingki i jala dang sanga maridi holan marsuhappon nambur ni duhut-duhut tingki dipardalanan do. hira-hira lima batu ma daoni huta i sahat tu onan. Alani las ni roha so nihilala be loja marikkati huhut mandangguri angka batu tu toruan i, sahat tu toru ni sihail-hail uli ma berengon angka nahumaliang, tarida ma tao i marhillong-hillong dohot dolok-dolok i songon na manarupi. Sahat tu Rumah sakit balige pe asa boi dohonon helleng dalani jala angka paronan sian huta naasing marudur-udur berengon manghunti angka boan-boanna tu onan i, adong mai naeng manggadis angka bagot ni horbo, manggadis gambiri, tolor dohot angka naasing. Taringot tutu Rumah sakit HKBP i tahe niingot dope Rumah sakit na jago hian do i ai godang do angka dokter sibontar mata hian disi jala godang do angka namarsahit sian Medan, Siantar dohot sian angka luat nasing dope marobat tusi. Hape saonari nibege barita hira soadong be angka namarsahit marubat tusi sian angka luat naasing, haru sian humaliang Balige pe tahe nunnga marubat tu Medan manang tu Siantar. nang pe songoni sai huingot do i jala sai masihol do iba mardalan sian onan i sahat tu Aekbolon mamolus Rumah sakit i. Aek bolon hatubuan hu
HATA MAULIATE
Napuran tano-tano rangging marsiranggongan
Badantai padao-dao tondinta i marsigomgoman
Mauliate ma nipasahat tu angka namangalehon tingki lumobi holong ni roha dihita pinompar ni ompui Ompu Mora.
Asa molo nibahenpe songon blog on, asa boi do hita pinompar ni ompui mangalehon panuturion manang pangajarion diangka nahurang lobi parbinotoan molo martaringot tu angka pomparan ni Ompu i. Jot-jot do disada-sada tingki pajumpang angka pomparan ni Ompu i alai dang masibotoan nang pe nungnga masipaboaan di goar ni Ompui.
Holan Ompu Mora i nama na sai diingot, molo lam nisungkun pomparan ni ise ibana sian naonom anak ni Ompu i so diboto be, gabe so binoto be aha do jouhonon. Sipata diangka namamboto pe dang diharikkoton pabotohon tu angka naumposo. ido umbahen tubu tupingkiran asa bo nian nisurathon nasa nabinoto nang pe lomos do roha ai nahurang situtu do iba diteknologi manang parbinotoan. Huulangkon mandok mauliate namangalehon pangajarion dohot panuturion, anggiat sai dipasu-pasu Tuhanta ma hita saluhutna pinompar ni Ompu Mora.