Anggaran Dasar dohot Anggaran Rumah Tangga Punguan Arisan Ompu Mora Sejabodetabek Nahumaliang tahun 2008

Denggan jala ture pardalanni punguan molo sude atur dibagasan ruhut-ruhut paraturan na dipature sude anggota nipunguan i. Alani i marsangkap do roha ni pomparan Ompu Mora laho paturehon punguan arisan pomparan Op. Mora naadong diJabodetabek nahumaliang on, gabe dibahen ma sada songon uhum namangarahut sada pambahenan namanghatindangkon goar ni punguan. Ima naginoaran Anggaran dasar dohot Anggaran Rumah Tangga. Songon natarsurat di toru on.

HATA PATUJOLO

Horas ma dihita sude!
Parjolo ma tapasahat mauliate nirohanta tu Amanta Debata pardenggan basa, ala tangkas do godang nipasu-pasuNa dihita ganup Pomparan ni Ompu Mora sian ari nasalpui sahat tu tingkion.
Holong do namangkuling dihita Pomparan ni Ompunta Ompu Mora, boru, bere/ibebere ditano parserahan on alani naeng ma tontong marsada niroha hita jala togu holong ni roha i lumobi molo jumpang angka ulaon arsak niroha manang las niroha. Marhite i porlu sada punguan/wadah nalaho mengkoordinir sude pomparan ni Ompu Mora ditano Jabodetabek on asa masibotoan/masitandaan, masiurupan, masipodaan, jala masihilalaan.
Marhite i porlu ma antong adong ondolan dinamandalanhon punguan i asa denggan jala ture, alani i dibahen ma Anggaran Dasar dohot Anggaran Rumah Tangga on. Mauliate ma di sude anggota/ruas namangalehon tingki dohot roha nauli gabe boi tarpatupa Anggaran Dasar dohot Anggaran Rumah Tangga on, sai anggiat ma sude hita Pomparan ni Ompunta Ompu Mora lam masihaholongan,masiurupan, masiantusan dohot masipasangapan, tatinggalhon ma angka nahurang denggan jala marsiadu ma hita paherbangkon punguanta on songon hata niumpasa :
“Pago-pago taruge pauk-pauk hudali
Angka nasala nipauli, nadenggan diulahi”

Sai Tuhanta ma na sai tontong mangalehon holong, tiur ni pingkiran dohot pansarian dihita jala sai digomgom ma punguanta on asa songon nidok ni umpasa :
“Emeni simbolon parasaran ni siborok
Sai horas-horas ma punguanta on jala Debatama na marorot”
Botima
Poda :
1. Unang asahon nasa gogom, alai asahon ma angka tangiangmu, ai ido na mangalehon gogo nasumurung
2. Hatahon ma natingkos dibagasan elek dohot serep ni roha, uang hatahon natingkos mardongan muruk manang asup-asup
3. Dang sae gogo ni suara paturehon angka na sala, holan dos ni roha do bonsir ni sude angka nauli

ANGGARAN DASAR PUNGUAN POMPARAN NI OMPU MORA, BORU,BERE/IBEBERE SEJABODETABEK TAHUN 2008

PASAL 1
GOAR, WAKTU DOHOT INGANAN
Goar ni punguan on ima Pomparan Ompu Mora,boru,bere/ibebere, waktu dang ditontuhon jala berkedudukan/namaringanan di Jabodetabek nahumaliang

PASAL 2
AZAS NI PUNGUAN
Punguan Pomparan Ompu Mora, boru, bere/ibebere on berdasarkan atas kekeluargaan dohot gotong royong/masiurup-urupan serta berazaskan hakristenon jala dang berpihak tu aliran politik manapun.
PASAL 3
SANGKAP DOHOT TUJUAN
1. Pahotton jala patoguhon hasadaan disude pomparan ni Ompu Mora, boru, bere/ibebere namaringanan di Jabodetabek nahumaliang
2. Masiurup-urupan dibagasan holong niroha asa sude mardomu dibagasan hasadaan disude ulaon tu hadengganon
3. Sisada panghilalaan diangka ulaon las niroha tarlumobi molo masa arsak niroha diangka pomparan ni Ompu Mora
4. Parsaoran marhite angka namasa diuhum paradaton dipomparan ni Ompu Mora dohot diangka paradatan

PASAL 4
RUAS/ANGGOTA PUNGUAN
Anggota/ruas punguan ima sude pinomparni Ompu Mora, boru, bere/ibebere namaringanan di Jabodetabek nahumaliang jala na manolopi Anggaran Dasar dohot Anggaran Rumah Tangga on

PASAL 5
PARHEPENGON/KAS PUNGUAN
Parhepengon/Kas ni punguan bersumber sian :
1. Uang Pangkal
2. Iuran wajib
3. Persembahan/penambahan kas
4. Sumbangan sukarela
5. Usaha-usaha naasing na so bertentangan tu AD/ART ni punguan
6. Donasi

PASAL 6
PENGURUS PUNGUAN
1. Pengurus ni punguan dipillit jala dipahot marhite rapot anggota
2. Periode masa kerja pengurus ima 3 taon
3. Pengurus ni punguan ima :
1. Penasehat
2. Ketua
3. Sekretaris
4. Bendahara
5. Komisaris Wlayah

PASAL 7
TUGAS-TUGAS PENGURUS
1. Penasehat martugas maniroi pengurus dohot angka anggota/ruas asa mambahen tu lam dengganna punguan
2. Ketua martugas mangkoordinir disude kegiatan ni punguan jala manotophon keputusan-keputusan na bersifat urgent, mangaradoti ulaon napinamasa ni punguan dohot namasa diruas, mambahen uso-uso tu ruas na so unduk tu AD/ART on jala dalan maniroi asa gabe unduk tu aturan ni punguan
3. Sekretaris martugas melaksanakan fungsi-fungsi administrasi, keanggotaan dohot kegiatan-kegiatan ni punguan jala mewakili ketua molo berhalangan
4. Bendahara martugas melaksanakan administrasi parhepengon ni punguan, manimpan/mangaluarhon sian kas sesuai dohot aturan ni punguan jala naung tinolopanni ketua, mamboan kas ni punguan setiap adong pardomuan ni punguan jala mambahen ruji-ruji parartaon marhite parhepengon dohot pelaporanna
5. Komisaris martugas :
1. Pasahatton tu Ketua angka namasa di anggota/ruas
2. Manampung usul ni anggota/ruas jala pasahatton di angka parrapoton
3. Manorangkon tu anggota/ruas namardomu tu AD/ART
4. Manogihon/maniroi tu angka Pomparan ni Ompu Mora na so mandohoti punguan dope

PASAL 8
ANGKA NA ASING
Angka na hurang/lobi di Anggaran Dasar on diatur jala dipahantus di Anggaran Rumah Tangga
Jakarta, 10 Agustus 2008

Ketua
K. Siahaan/Op. Merdeka

ANGGARAN RUMAH TANGGA PUNGUAN OMPU MORA, BORU, BERE/IBEBERE
SEJABODETABEK TAHUN 2008

PASAL 1
KEWAJIBAN ANGGOTA/RUAS
1. Manggarar uang pangkal Rp.50.000,- (lima puluh ribu rupiah) per anggota
2. Manggarar uang iuran Rp.10.000,- (sampulu ribu rupiah) per arisan jala digarar/dipungut ma i ditingki arisan
3. Paboahon/pabotohon na masa (las niroha/arsak ni roha) tu pengurus manang tu angka anggota/ruas
4. Manumbang tu punguan manang tu anggota diangka ulaon las ni roha/arsak ni roha
5. Manopot angka anggota ni punguan namarsitaonon/musibah
6. Mematuhi ketentuan-ketentuan naung tarsurat di Anggaran Dasar/Anggaran Rumah Tangga on
PASAL 2
HAK-HAK ANGGOTA/RUAS
1. Berhak mamillit jala dipillit gabe pengurus marhite rapot anggota
2. Berhak mandapot pangurupion sian punguan hombar tu tordingna :
A. TINGKI LAS NI ROHA
1. Pangolihon anak : pasahaton ni punguan do tumpak godangna Rp.200.000,- (dua ratus ribu rupiah)
2. Pamulihon boru : pasahaton ni punguan do songon pangganti ni ulos ima ulos na tinonun ni pamarenta godangna Rp.200.000,- (dua ratus ribu rupiah) tu suhut
3. Diangka ulaon las ni roha na asing asa dipabotohon melalui gokkon/undangan ma tu pribadi-pribadi ni anggota/ruas, jala haroroni anggota disesuaikan ma tu paradatan na hombar
B. TINGKI ARSAK NI ROHA
1B. NAMARSAHIT
1. Namarsahit : di rawat inap/opname di rumah sakit 3 (tolu) ari manang lobi ro do punguan besuk jala pasahaton ni punguan do songon ganti ni buah godangna Rp.200.000,- (dua ratus ribu rupah) sarupa do molo dirawat di tabib
2. Di angka partikkian dang sanga punguan membesuk tu rumah sakit, roma punguan tu tabagasna pasahatton songon ganti ni buah Rp.200.000,- (dua ratus ribu rupiah)
3. Molo rawat inap/opname di luar Jabodetabek, ro do punguan pasahatton ganti ni buah Rp.200.000,- (dua ratus ribu rupiah) tu bagasna dung mulak sian rumah sakit
4. Namarsahit di jabu dipabotohon ma tu punguan/anggota jala masing-masing pribadi ro ma songon na mambesuk
2B. NAMONDING
1. Molo anggota (Ama/Ina) namonding pasahaton ni punguan do pangurupion sian kas godangna Rp.300.000,- (tolu ratus ribu rupiah) jala dipadalan do tok-tok ripe sian anggota/ruas balgana Rp.50.000,- (lima puluh ribu rupiah) / KK jala dipasahat mai ditingki ro punguan Mangapuli/marhata togar-togar
2. Molo anak/boru ni anggota na monding pasahaton ni punguan do pangurupion sian kas godangna Rp.300.000,- (tolu ratus ribu rupiah) jala dipadalan do tok-tok ripe sian anggota/ruas balgana Rp.50.000,- / KK jala dipasahat mai ditingki ro punguan mangapuli/marhata togar-togar
3. Natua-tua/simatua ni anggota na monding dijolona dipasahat punguan do pangurupion Rp.300.000,- (tolu ratus ribu rupiah). Jala dipadalan punguan do kantung ilu manetek ima take and less sian anggota/ruas, dipasahat mai ditingki ro punguan Mangapuli/marhata togar-togar
4. Natua-tua/simatua ni anggota na monding di Bonapasogit, ro do punguan mangapuli/marhata togar-togar jala dipasahat ma songon pangurupion godangna Rp.200.000,- (dua ratus rbu rupiah)
5. Sipanganon di ulaon Mangapuli/marhata togar-togar i sitanggungon ni sude anggota/ruas do i, ima : daging Sapi 2 Kg + kantang 1 Kg

PASAL 3
ANGGOTA NA PINDAH
Molo adong anggota naeng pindah manang mulak tu Bonapasogit dipabotohon ma tu punguan melalui pengurus/anggota, jala ro do punguan songon na paborhatton dohot pasahatton kenang kenangan/cindera mata balgana Rp.300.000,- (tolu ratus ribu rupiah)

PASAL 4
POMPARAN OMPU MORA NASO TARDAFTAR
1. Molo masa habot niroha/arsak ni roha di angka Pomparan ni Ompu Mora di Jabodetabek na so tardaftar gabe anggota ni punguan diadopi ma hombar tu adat namasa di Jabodetabek, isarana rupani pasahatton Ulos Tujung/Saput/Sampe tua, alai dang mardalan pengeluaran Kas ni punguan songon natarsurat di AD/ART.
2. Molo adong diangka ulaon arsak ni roha isarana rupani “Marhata togar-togar/mangapuli/manghata-hatai di angka pomparan ni Ompu Mora se Jabodetabek na so tardaftar gabe anggota ni punguan diadopi ma sesuai tu gokkon, jala boan-boan/sipanganon na hombar tu ulaon i di parade na manggokkon ma
3. Molo masa arsak ni roha/manang si las niroha di pomparan ni Ompu Mora di Jabodetabek naung tardaftar gabe anggota ni punguan alai dang mandohoti arisan dipadalan ma sesuai dohot na tarsurat di AD/ART

PASAL 5
ARISAN
Dipatupa punguan do arisan alai dang hira kewajiban tu sude anggota, jala anggota na mangihutton arisan i ditontuhon ma :
1. Balga ni arisan Rp.50.000,- (lima puluh ribu rupiah)
2. Arisan ditontuhon sahali 2 (dua) bulan di Minggu paduahon (ari minggu) songon inganan parsaoran disude anggota jala masuk pukul 14.00 WIBB, Molo adong anggota/ruas namangido perubahan waktu manjabui dipasahat ma ditingki parpunguan arisan naparpudi

PASAL 6
PANUTUP
1. Anggaran Dasar dohot Anggaran Rumah Tangga on ima hasil rapot ni anggota Pomparan ni Ompu Mora tanggal 11 Mei 2008 di bagas ni Amanta H. Sitio/Br.Siahaan na beralamat di Jln. Sarbini III Rt.07/06 Kel/Kec. Makasar Jakarta Timur jala dipature muse di bagas ni Omp. Romauli na beralamat di Perumnas Cengkareng tanggal 10 Agustus 2008, dipahot muse di bagas ni Ama. Wen di Saribumi Indah Tangerang tanggal 12 Oktober 2008.
2. Sude natarsurat di Anggaran Dasar/Anggaran Rumah Tangga on gabe sada panduan ma dihita sude laho padalanton punguan on, alani i tama ma hita mangihutton AD/ART on
3. Angka nasoniatur di AD/ART on dope, tontuhonon dope ditingki na hombar tu namasa naso bertentangan tu azas ni punguan, jala sai ditontuhon ma di bagasan dame, serep ni roha dohot dos ni roha.

Ditotophon,
Jakarta, 10 Agustus 2008
Ketua
K. Siahaan/Op. Merdeka