Ulos Namarhadohoan : Rumang hata sidohonon tingki pasahathon ulos herbang

Ulos sipasahaton ni parboru :
1.Ulos pansamot (Natoras/amang/Inang ni pangoli)
2.Ulos Hela + Mandar = Pengantin
3.Ulos Pamarai
4.Ulos ni anak Manjae =simanggokkon
5.Ulos sihunti ampang

Ulos Pansamot/Ulos pargomgom :
Dihamu lae dohot ibotonghu, parjolo ma ta dok mauliate tu adopan ni Amanta pardenggan Basa i dinaung manjalo pasu-pasu parbagason anakhonta, anakmu-helanami, borunami-parumaenmu sian Tuhanta dibagasan joroNa marhite-hite naposo ni Tuhanta. Dison ro do hami pasahathon ulos pansamot tu hamu lae asa sai margogo hamu lae mangalului pansamotan laho marmudu-mudu hela dohot borunami on naung gabe parumaenmon, asa gabe sada ina siboan las ni roha dohot dame ibana ditonga-tonga ni keluargamu. Ulos naganjang ma ulos on, ulos nabidang jala sitorop rambu, mardongan tangiang nami tu Tuhanta pardengggan basa i, sai ganjang ma umurmu dao angka parsahiton "asa andor halumpang ma togu-togu ni lombu, nang togu-togu ni horbo. Sai saur matua ma hamu lae dohot ibotonghu, togu-toguon ni pahompu sahat tu namarnini marnono".
Ulos nabidang ma ulos on, sai asima roha ni Tuhanta dilehon dope dihamu angka pansalongan nabidang "asa binanga ni sihombing ma binongkak ni tarabunga, tu sanggar ma amporik tu lubang satua. Sai sinur ma napinahanmuna gabe nang naniulamuna.
Ulos sitorop rambu ma ulos on, sai tu toropma angka pomparanmu angka anak partahi jala ulubalang dohot boru nauli basa tubuhonon ni parumaenmon.
Asa Sahat sahat ni solu ma sahat tu bontean, hupasahat hami ma ulos herbang on tu hamu lae-ito, sai leleng ma hamu mangolu sai horas sahat tu panggabean. Las ma rohamu manjalo!

Ulos Hela + Mandar
Dihamu amang hela dohot di ho inang boru hasianhu, sadarion nunga dijalo hamu pasu-pasu parbagason sian Tuhanta marhite naposoNa di bagas joro ni Tuhanta. Si dok mauliate ma hamu ala sudena i, ai ido dipangido Debata sian hamu marhite-hite Yesus Kristus siala naung dipungka hamu parsaripeonon. Dison ro do hami laho pasahathon tu hamu ulos herbang, ulos naganjang, ulos nahapal sitorop rambu. Nunga dipadomu hamu Debata hamu gabe sada ripe naimbaru, sai ganjang ma umur muna, sai Tuhanta ma namangaramoti hamu dingolumuna jala dao angka parsahiton.
Ulos nahapal ma uloson, sai dipahapal Debata ma dihamu holong niroha dohot dame. Asa songon nidok ni natua-tua :

"Pege sangkarimpang, hunik sahadang-hadangan. Mangangkat ma hamu rap tu ginjang, manimbungrap tu toru tontong satahi saoloan"

"Sinimbur ni pangkat ma tu sinimbur ni hotang
Tu dia pe hamu mangalakka, sai mamasu-masuma Tuhanta, di si hamu dapotan parsaulian"

Ulos sitorop rambu ma uloson dohot tangiang nami mangido tu Tuhanta :
"Tubuan laklak tubuan sikkoru didolok nipurbatua
Sai asima roha ni Tuhanta, tubu ma dihamu anak partahi jala ulubalang
Dohot boru angka naulibasa donganmu sahat tu nasaur matua

"Andor ras ma tu andor ris, bulung ni tobu pangarahutna
Hupasahat hami ulos herbang on tu hamu
Sai horas ma hamu jala torkis diramoti holong ni roha ni Tuhanta

Sahat sahat ni solu ma sahat tu bontean
sai leleng ma hamu mangolu, sai horas sahat tu panggabean

Udutna, Pasahathon Mandar :
Dihamu amang hela dison mandar hela huampehon hami tu abaramu, martanda ma hamu helanami.Asa unang manarnaloja hamu mangulahon angka ulaon namasa ditonga-tonga ni angka hula-hulamu. Horasma...!!

Ulos Pamarai :
Dihamu amang boru dohot namboru nami (lae dohot ibotonami) dison ro hami pasahathon ulos herbang, ulos pamarai tu hamu. Ulos naganjang, ulos nabidang sitorop rambu dohot tangiang nami mangido tu Tuhanta pardenggan basa I, sai ganjang ma umurmu sai dao ma parsahiton. Ulos nabidang ma on sai dilehon Tuhanta dihamu bidang angka parsaulian dohot pansamotani, asa sai tong-tong dibagasan hahipason jala dibagasan las ni roha hamu sauduran angka namarhaha-maranggi, masitungkol-tungkolan songon suhat dirobean disude angka ulaon dohot namasa ditonga-tonga muna. Ulos sitorop rambu ma uloson, sai torop ma pomparanmu tu joloan on. Jalo hamu ma ulos herbang on amang boru dhot namboru (lae dohot ito), asa "Andor halumpang ma togu-togu ni lombu, dipasu-pasu Tuhanta ma hamu saur matua sahat tu naditogu-togu pahompu", las ma rohamu !

Ulos ni anak manjae (Simandokhon) :
Dihamu berenami (laenami)simandokhon diulaon parsaripeon ni helanami dohot borunami, dison ro do hami pasahathon ulos herbang tu hamu, ulos ni simanggokhon digoari ulos on, ulos naganjang, ulos nahapal, ulos sitorop rambu dohot tangiang nami tu amanta Debata sai ganjangma umurmu dibagasan parhorasan, sai tu lam hapalna ma holong ni rohamu mangurupi natorasmu nang mangalugahon parsaripeonmu, sai torop ma pomparan dihamu sibahen las nirohamu, jala songon nidok ni situa-tua ma dohonon nami :

"Sitorop ma dangkana, sitorop nang rantingna
Gabe jala mamora hula-hulana, songoni nang ianakhonna

Sahat ma solu sahat tu bontean
Sai leleng ma hamu mangolu
sahat tu parhorasan sahat tu panggabean

Jalo hamu ma ulos on....!!

Ulos Sihunti Ampang :
Dihamu berenami sihunti ampang diparsaripeon ni helanami dohot borunami, dison ro do hami pasahathon ulos herbang tu hamu, ulos si hunti ampang digoari ulos on, ulos naganjang, ulos nahapal, ulos sitorop rambu. Sai ganjang ma umurmu dibagasan parhorasan, sai lam tu hapalna ma holong ni rohamu mangoloi hula-hulamu, sai torop ma pomparan di hamu sibahen las ni rohamu, jala songon ni dok ni situa-tua ma :

"Sitorop ma dangkana, sitorop ma rantingna
Gabe jala mamora hula-hulana, songoni nang boruna

Sahat-sahat ni solu sahat tu bontean
Sai leleng ma hamu mangolu
Sahat tu parhorasan sahat tu panggabean

Tambahan si jalo Ulos (namangihut) :
Haha/anggi ni suhut (sijalo ulos todoan)
Boru ni suhut namarhaha-maranggi
Pomparan ni ompung ni suhut marhaha-maranggi (sijalo ulos todoan)
Pomparan ni amang mangulahi ni suhut (sijalo ulos todoan)
Ulos tu punguan parompuan
Ulos tu punguan marga