3 Feb 2010

Parjambaran ulaon di jabu

Angka ulaon di jabu tardokma : Tardidi dakdanak (partangiangan dung mulak sian gareja), malua sian panghanghungi (dung mulak sian gareja), manuruk/mangompoi jabu.

Diangka ulaon sisongonon digonghon hasuhuton ma dongan tubuna, dongan sahuta, boru/bere, pariban, hula-hula, jala sipata sahat tu Tulang. Masa do dung sidung marsipanganon sae jolo disunghun hula-hula manang Tulang partording ni tudu-tudu sipanganon i. Jala dialusi hasuhuton (pai dua ni suhut) ma antong. Dungi intor diboan pamoruon do tupudi asa disi dipature, jala dinanaeng mulak pe annon asa dibagihon tu natalup mandapotsa.

Dinapiga-piga hali niihuthon ulaon sisongonon, hira asal rambing nama angka parjambaran i dipatupa. Sipata dang margoar jambar be, ai nunga gabe saksang dibahen namangulahon. Mangarimangi ma iba, nasodiantusi namangulahon ma haroa parbagian parjambaran. Udut tusi dison nisurathon ma jolo parjambaran di jabu na niboto (Toba holbung) :

Hula-hula : Namarngingi/parsanggulan parsiamun

Tulang : Namarngingi/parsanggulan parhambirang

Tulang rorobot : Sombasomba

Bere/pariban, Dongan sahuta/ale-ale, Pangula ni huria : Soit

Hasuhuton dohot dongan tubu : Ihur-ihur

Sipata nibereng olo ditambai hasuhuton juhut songon namanambai jambar i, nauli jala nadenggan ma i tutu

No comments:

Post a Comment

Tidak diklaim kalau yang saya upload adalah sudah benar, jadi bila ada masukan/komentar yang sifatnya meluruskan apalagi menyangkut silsilah/tarombo dengan rendah hati akan saya terima dan saya ucapkan terimakasih